View Point- Iran Nuclear Program I

G8 kan tih khawvel ram hausa ber ram riat- Germany, France, Britain, Italy, Russia, United States, Japan leh Canada-te chuan July 8, Nilai tawhtan atanga July 10 thleng khan L’Aquila, Italy-ah rorel an nei a, tun tum meeting-ah chuan South Africa, Mexico India, China leh Brazil te pawh an sawm ve a, an rorel thupui berte chu global warming te, globilaiztion, climate change lam te leh Iran nuclear program chungchangte an ni a, Iran-in tun Septempber thla hmaa a nuclear program a chawlhsan loh a nih chuan tun aia nasa zawka sanction pek a nih tur thu France President Nicholas Sarkozy-a chuan tun tum G8 Summit an neih tum khan a sawi a ni. G8-te chuan Iran nuclear program chungchang kum saruh meuh an lo buaipui tawh a, mahse vawin thlenga hmasawnna engmah a la awm theih loh avangin tun tum G8- hruaitute inhmuhkhawm tum khan Iran chungchang an rel nawn leh a ni. United Nations Security Council pawhin North Korea leh Iran-te chungah vawi tam tak warining a pe tawh a, mahse UN Security Council thuchhuak an ngaih pawimawh loh avangin UN pawhin tun a chin chu hun tiam chin a siam chat chat tawh ang a, chanchin a hriattir zung zung tawh dawn a ni. President George W.Bush-a pawh khan theihtawp chhuahin tawngkam na tak takte nen a lo bei nasa tawh a, mahse a hlawhchham tlat a ni. Tun tum G8 rorel hian engang chiah in nge action a lak dawn hriat a la ni lova, zangna dawmna nen a thlem leh dawn nge sanction khawh tak a pe zawk dawn tih chu sawi mai theih a la ni lo. A eng zawk pawh lo ni se, Iran chunga hlawhtlinna a awm dawn phawt chuan Russia leh China-te pawhin tun tumah chuan an rawn amen pui nghal dawn a ni. Mahse Russia hian Iran chunga G8-te rorel enangin nge a rawn amen pui dawn hriat a nih loh avangin thlirtu tam tak chuan Russian thuneitute tawngkam chhuak chu hriat an nghakhlelin an lo thlir reng tawh a ni. Thla kal ta ah kha chuan Iran chuan presidential election a nei a, Iran hruaitute leh mipuite inkarah buaina rapthlak tak a chhuah bawk a, vawiin ni thlenga Iran ram chhung buaina a la reh loh avangin G8 hruaitute leh Iran nuclear program-a thuneitute pawh an buai hle a ni. G8 hruaitute chuan Iran buaina chungchangah an thinrimna leh lungawilohnate lantir a, hnunglam hawisan an tum mek laiiin US President Obama erawh chuan ‘zai aw dam dam’ tiin beiseina sang tak nena thu sawiho a duh zawk niin a lang. June Ni 4-a President Obama-an Middle East a fan tum khan Iran hruaitute nena dawhkan chunga thusawiho a duh thu Egypt khawpui, Cairo-a a sawi avangin Iran hruaitute pawh an luh lul zo vek niin mi tam tak chuan an hmu a, US chanchinbu mite leh journalist thenkhatte lah chuan, “Israel-in Iran chuangah kut a thlak hmasa dawn,” tia chanchin an lo thehdarh vel avangin tunah hian Iran nuclear program chungchanga an buaina chu a thuk deuh deuh a ni. US President Obama erawh chuan, “US-in Israel hnenah Iran chunga kut thlak hmasa turin engmah a sawi lo,” tiin CNN-ah a sawi ve thung a. Israel-in Iran chungah kut thlak hmasa ta ni se, engnge lo awm zel ta ang? Iran-in a nuclear program chawlhsan a tum dawn lo tih a chiang a ni. Iran chuan Israel chu khawvel map atanga thai bo hmiah a tum si chuan he a nuclear program hi a tihhlawhtlin ngei a tul dawn a, chuvangchuan Iran hian awlsam tak chuan a nuclear program a bansan mai chu a rinawm loh hle a ni. US in Iran chuangah eng ang policy nge a hman chhunzawm zel dawn tih hriat mai theih a ni lova, Obama hian Muslim khawvelte nena indawrtawnna tha siam a beisei tlat si chuan Iran chuangah hian awlsam tamin harsh diplomacy chu a hmang nghal mai dawn lo a ni tih chu thui tak a thlir theih a ni. Thlirtu tam tak erawh chuan US in Iran chuanga hruisei tak thlun reng ai chuan EU, Russia leh China-te nena tanrual a, Iran-in a thil tih sim vang vang tura hremna pek hi a hun tawh hle niin an hmu ve thung a ni. Iran tana hun hnuhnung ber chu Septempber a ni ta mai a, kar sawm tha vel hun a la awm a, Iran-in September thla hma ngeia thutlukna a siam thei chuang lo a nih chuan G8 leh China leh Russia te hian engangin nge Iran chuangah kut an thlak dawn tih chu ManU vs Chelsea ai pawhin a hmuhnawm mai theih a ni.