Jame Earl “Jimmy” Carter,Jr.
Kum 1924, October 1 khan Georgia State, Plains-ah a piang a, America President 39-na niiin kum 1977 atanga 1981 thleng khan President nihna a chelh a, kum 2002 khan Nobel Peace Prize a dawng bawk a ni. President a nih hmain Georgia Senate term hnih a chelh a, kum 1971 atanga 1975 thleng khan Georgia Govenor hna a chelh bawk a, a ni hi Georgia Governor 76-na a ni.
US President a nih hnu chuan US ram chhung hmasawn nan cabinet level department pawimawh tak pahnih a din a, chungte chu Department of Energy leh Department of Education-te an ni. National Energy Policy fel takin a siam bawk a, chu policy chuan US mipiten an mamawh ber energy enkawla humhalhthat, price control leh technology lama hmasawnna thar zawn zel te a huam tel vek a ni.
Jimmy Carter-a hian ram pawnah pawh hmalakna a nei zau hle a, chung zinga a pawimawh zualte chu Camp David Accords, the Panama Canal Thuthlung te leh Strategic Arms Limitation Talks Round II-na (SALT II) te an ni. Carter-a hian human rights chungchangah hna a thawk nasa hle a, kum 1979-a Israel leh Aigupta ten inremna thuthlung an siam pawh kha Carter-a hmalakna ropui tak vang liau liau a ni a, hetianga remna palai hna a thawh avang hian kum 2002 khan Nobel Peace Prize a dawng hial a ni. Panama Canal Zone atanga a lo haw tum khan mi tam tak chuan Latin America-a US thuneihna leh thiltihtheihna zauzia an hmu chiang a, chuti rual rualin mite demna leh fakselna a tawk nasa hle a, tawngkam mawi lo tak takte pawh a dawng nasa hle a ni.
A term zawh dawn lam phei kha chuan hmingchhiatna eng eng emaw leh harsatna a tawk ve nual a, chung zinga a pawimawh zual bikte chu kum 1979 November Ni 4-a Tehran khawpuia US Ambassy an suam tuma mi (100) chuang an man te chhanchhuak tuma a chhanchhuah theih loh te, US ram chhunga khawvartui tlakchham thutna te, kum 1980-a Soviet-in Afaganistan a run chungchanga US in a tanpui lohte an ni. Chung zawng zawngte avang chuan US mipuite an thin a ur hle a, Carter-a duhtu ai mahin duh lotu an tam zawk a, kum 1980-a Democratic Presidential Election-ah Ted Kennedy-a nen an inbei a, Ted Kennedy-a chu a hneh a, mahse US Presidential Election-ah Republican Candidate Ronald Reagan-a chu a hneh ta lo a ni.
President nihna a bansan hnu in a nupui Rosalynn-i nen The Carter Center tih chu NGO angin an din a, he Center-in a tum ber chu human rights leh civil rights tihmasawn tura ram hrang hranga hnathawh a ni. Khawvela remna zawngin leh palai anga inremna thu sawi turin khawvel hmun hrang hrangah a zin a, ramtin hruaitu inthlanna (Election) –ah dikna a awm nge awm lo tihte endikin hma a la zel bawk. Tunah chuan ram rethei leh hmasawn mek ramah te zinin hri tha lo leh natna tha lo laka inven dante zirtirin training, seminar chi hrang hrang a buaisaih a, damdawi lama rawngbawlna hi The Carter Center hmalakna pawmawh tak a ni bawk.
Carter-a hi Habitat for Humanity Project-a mi pawimawh tak mai a ni a, a bik takin Middle East-a Israel leh Palestine-te buainaah phei chuan Carter-a hian pawimawhna thuk tak a nei a ni. George H W Bush-a aiin thla 3 leh Ni 19 chiahin a naupang a, George H W Bush-a tih lohvah chuan US President dam laite zinga a upa ber dawttu a ni.
1. Pian kum- October 1, 1924
2. Pinana hmun- Plains, Georgia State
3. Nausen lai hming- James Earl Cater, Jr.
4. A san lam- 1.75m/5' 9''
5. Political Party- Democratic
6. A nupui- Rosalynn Smith Carter
7. A fate-
(1) John William Carter
(2) James Earl Carter III
(3) Donnel Jeffrey Carter
(4) Amy Lynn Carter
8. A zirna run-
(1) Georgia Southwestern College
(2) Union College
(3) United States Naval Academic
9. A hnathawh-
(1) Thlai huam siam
(2) Naval Officer
10. A sakhua pawl hming- Baptist
11. A sipai tan hun chhung- 1946- 1953 thleng
12. A sipai Service/Branch- United States Navy
13. A nihna (Rank) – Lieutenant
14. US President a chelh kum- January 20, 1977- January 20, 1981
15. A Vice President- Walter Mondale
16. A hmaa US President nihna lo chelhtu- Gerald Ford
17. A hnua US President nihna rawn chelhtu- Ronald Reagan
18. 76th Governor of Georgia nihna a chelh kum- January 12, 1971- January 14, 1975
19. A lieutenant – Lester Maddox
20. A hmaa Governor of Georgia hna lo chelhtu- Lester Maddox
21. A hnua Governor of Georgia hna rawn chelhtu- George Busbee
22. Member of the Georgia State Senate (District 14 Infinkhawm) hna a chelh kum- January 14, 1963 – 1966
23. Electoral Vote- Term 1:297
24. A hnehna Margin: 0. 104
No comments:
Post a Comment