Englist Tawng hman chungchangah Malaysia-in buaina a tawk

Kuala Lampur
July 9, 2009

Malaysia chuan July 8, 2009 Nilaitawhtan Ni khan English tawng chungchangah dan thar a siam a, 2012 atang chuan Math leh Physics subject-ah English tawnga zir tawh lova, Malaysia tawng Bahasa tawnga zir tawh turin dan thar a siam a ni. Mi tam tak chuan hetianga sawrkarin dan thar a rawn siam hi zirna kawnga hmasawnna atana siam ni lovin politics lama mipuite rilru hip duh avanga tidanglam ta niin an sawi a ni. He dan thar avang hian mi tam tak an lawm lo hle a, zirna kangah inhnialna nasa tak a chhuak bawk a ni.

St. John Sikula zirtirtu Mr. Han-a phei chuan, “English tawng hi mithiamten chhiarkawp leh science lam zir nan kum 300 meuh an lo hmang tawh a, tuna Bahasa tawng hi chuan chhiarkawp sang tak leh scientific lam thilte a chhut thei tak tak dawn lo a ni. Science lama hmasawnnate hi English tawng veka ziah a ni,” tiin science lam zir nana English a pawimawhzia thu a sawi a.

Malaysia hian kum 2003 atang chauh khan Math leh Physics zir nan English tawng a hmang a, heng subject-a English tawng hmang tura buaipuitu leh sulsutu ber chu Prime Minister nihna lo chelh tawh Mahathir-a kha a ni. Tun tuma sawrkarin dan thar a rawn siam tak avang hian Mahathir-a pawh a lungawi lo hle a, “Sikul naupangten English an thiam tha lo a nih phawt chuan hna sang tak pawh an chelh thei dawn lo va, chuvangin he dan thar hi Malaysia sikul naupangte tana thil pawi tak a ni, tiin pawi a tih thu a sawi bawk a ni.

University of Malaysia-a history professor Khoo Kay Kim-a pawhin, “ Tunah chuan Malaysia-a professor tam tamten English tawngin engmah an ziak thei mumal tawh lova, Malaysia-in English tawng thiam lama Asia hmahruai a tum mek laiin tunah chuan keimahni leh keimahni kan intihniam ta a ni. Hei hi ram leh hnam tana thil zahthlak tak a ni a, Asia University zinga university upa ber University of Malaysia pawh tunah chuan Asia rama university awmte aiin a hniam tawh zawk a ni. Malaysia-in English thiam tha sikul naupangte a neih loh chuan ram dang atanga multinational company-te pawhin Malaysia-ah hna an rawn thawk duh tawh lovang a, ram dangten min khum tawh dawn a ni,” tiin a sawi a ni.

Zirna lama hruaituten politics thil avanga English tawng hman an rawt mek laiin Malaysian International Chamber of Commerce & Industry-a executive director Steward Forbe-a erawh chuan, “Zirna kawnga English tawng hman hi sawrkar policy a ni tur a ni. Malaysia-a private company tam takten Malaysia University atanga graduate-ten communication skill an tlakchham thu leh a bik taka English ziak leh chhiar an thlakchham thu an sawi fo avangin Malaysia sawrkar hian English tawng zirna kawngah hma a sawn a tul hle a ni,” tiin sikul naupangten English zirna kawnga hma an sawn a duhsak thu a sawi bawk a ni.

Sawrkarin Math leh Science subject zirnaa Bahasa tawng hman a rawtna chu Chiness leh Indiaan (Tamil)- ho ten an amen pui a, mahse nu leh pa tam tak chuan sawrkar dan thar siam chu pawm har an ti a, an lung a awi lo hle a ni.

Tun tuma dan thar an siam hian engangin nge Malaysia zirna a tihdanglam ang a, engang buainate nge a rawn hrinchhuah dawn hriat ni lo mah se hun rawn kal zelin Malaysia buaina chu a hrilhfiah mai zawk dawn a ni.