Dubai World chuan chhiatna rapthlak a tawk

Dubai World-in leiba maktaduai tel a neih chu Natioanal Bak of Abu Dhabi chuan a tanpui mek a, nimin piah lam pawh khan National Bank chuan $ 5 billion meuh a puktir thu a puang a. Dubai World hian tunah leiba $59 biilion meuh a nei a, nikum kum tawp lam pawh khan $59.3 billion lai leiba a lo nei tawh bawk a, chu thu chu August 20 khan Nasdaq Dubai Website-ah Nakheel Development Ltd., chuan a tarlang tawh bawk. Dubai World-ah hian ram chhung ram pawn atanga Banking lam te, Real Estate lam te, Transportation leh Tourism lam pawhin investment tam tak an nei a, heng company zawng zawngte hnenah hian Dubai World hian leiba chhiarsen loh a lo nei teuh a ni. Henga a leiba te hi a pek theih loh avangin Dubai hruaitute pawh nasa takin an buai a, an building sang pui pui sak mekte pawh an chawlhsan vek a, amaherawhchu a ram chhunga harsatna chu enliam mai lovin National Bank of Abu Dhabi chuan tanpui a lo tiam ta a ni.

Dubai World chuan khawvela building sang ber a sa mup mup a, architectures mithiam tam takte ruaiin khawvela tuipui thlirkar lian ber a siam bawk a, ram chhung ram pawnah pawh investment tam tak a nei bawk a ni. Mahse hetianga in leh lo man a rawn tlat thut tak avang hian Dubai World chuan cheng tam tak a hlauh dawn ta chu a ni a, hetianga in leh lo man a tlat thut avang hian Dubai World cheng puktirtu Europe Bank lamte pawh a khawihpawi thei ang em? tih hi Dubai World-a investment siamte chuan an hlau ru hle a ni. Khawvel Stock Exchange rate a tlak mek lai a, Dubai World-in chhiatna a tawk ta chu Banking and Finance lama mithiamte pawh a tithlabar hle a, Dubai World leiba hi awlsam taka chhanchhuah leh theih a ni ang em ni lo ang em tih hi thlirtute ti ti titam bertu chu a ni.

Dubai leiba avangin Dubai hruaitu lu ber Sheikh Mohanmmed Bin Rashid Al-Maktoum-a pawh a lu a hai hle a, zah pawh dawn zo lovin National Bank of Abu Dhabi hruaitute hnenah tanpui a zuk dil a, chuti rual rualin Dubai World Finance lama mawhphurtu thenkhat pawh a ban nghal hmiah bawk a. He crisis avang hian National Bank of Abu Dhabi leh Islamic lender Al Hilal Bank-te chuan Dubai World atangin $ million 10 vel an tlanchhuahsak ang a, Saudi Arabia leh Qatar-te pawhin Dubai World chhunzawm leh a nih theih nan cheng tam tawk an tanpui bawk dawn a ni.

More