View Point Israel in 1967 Ni Ruk Indona (Six Day War)-a a lak Palestine ram West Bank-a In a sakbelh zel chu US chuan sakbelh tawh lo turin May Ni 28 Nilaithawhtan Ni khan thu a pe a, US leh Israel te inkarah pawh buaina degree a sosang chho hle a ni. He mi ni hian Washington-ah Palestine President Mahmoud Abbas-a leh President Barack Obama te pahnih an inkawm a, Abbas-a zin chhan ber chu West Bank-a Israel te insakbelh zel titawp tura US inrawlhtir a ni. May 27 Nilai Ni pawh khan Obama chuan insakbelh mekte pawh chawlhtir vek a duh thu leh Road Map to Peace ah hian Isarel pawh party pakhat a nih avangin insakbelh mekte tihtawp hi a mawhphurna a nih thu US Secretary of State Hillary Rolham Cliton-i chuan a sawi a, mahse Israel lam atanga sawrkai palai Mark Regev-a erawh chuan a then sak chhunzawm zel tur a nih thu a puang thung. President George W.Bush-an President hna kum 8 a chelh chhung khan Israel te insakbelh chungchangah a beng a chhungawng tlat a, Obama rorelna term ah erawh chuan Middle East chunga US policy a danglam ta hle dawn a ni. Bush-a rorelna khan Israel te thiltih chuangchangah a ka hupbet tlat mah se Obama rorelna erawh chuan hmaizahna awm miah lovin Israel te thiltih dik lohzia a thailang hmiah hmiah mai dawn niin a lang. May thla chhunga Israel Prime Minister Benjamin Netanyahu-a leh President Obama-te White House-a an inhmuh hmasak ber tumah pawh Obama chuan Israel ten ram an din ang bawka Palestine ten an ram an din ve a tul thu leh Israel ten building an sakbelh zel tihtawp vat hi inremna rahbi hmasa ber a nih thu a sawi a, Netanyahu-a erawh chuan Obama ngaihdan chu a pawm lo hle a ni. June Ni 4 hian Obaman Middle East a fang dawn a, he mi Ni hian Aigupta khawpui Cairo-ah thusawina a nei ang a, Obama rorelna hian engangin nge Muslim khawvel a hmuh tih a chiang hle dawn a ni. Israel hmelma lian ber Iran leh US hian kum 30 dawn lai (diplomatic) indawrtawnna an nei tawh lova, mahse Washington zawk hian hma hruiain Iran nena an indawrtawnna chhe tawh chu siamthat leh a tum dawn a ni. Israel hian Obama policy chu pawm thei, pawm lo thei ni mah se Prime Minister Netanyahu-a erawh chuan US nena an inzawmna eng eng emaw a khawih pawi thei a ni tih a hmu chiang a, a thusawi pawh a fimkhur hle a ni. Mahse US leh Israel inkara buaina a sosan lai ber a nih avangin Israel thuneitu thenkhatte erawh chuan White House rorel dan chu pawm har an ti hle niin a lawng bawk. Israel chuan security leh foreign policy lama US nena an inzawmna chu thil pawimawh ber niin a hmu a, Israel hian US rawtna a hnial tlat chuan US pawhin ekawnawmic leh ralthuam zawrhte a titlem thei a, information leh joint project an neih mekte leh anti-missile stystem-a an inzawmna te pawh a khawihpawi thei a ni tih chiang takin a hmu a, White House nena an indawartawnnaah a fimkhur hle a ni. Tunah hian West Bank-ah Israel in building 120 a sakbelh tawh a, Israel in hetianga In a sakbelh zel avang hian Palestine mipuite pawh an chi-ai nasa hle a, kum tam tak an lo thlir fan fan Palsetine ram lo piang tur chu an zan mang ang lekin an hmu tawh a ni. Tuna Israel ten dan lo anga an luah ramah hian Israel mi nuai thun (300,000) lai an awm tawh a, Palsetine mipuiten an khawpui lo piang tura an beiseina Jerusalem Chhaklamah pawh Isrel mi nuai hnih (200,000) an awm bawk a, West Bank lamah pawh Palestine mi maktaduai hnih an awm bawk a ni. May thla tirh khan Israel thuneitute chuan construction sa tura an ruahman hmun 22 an titawp a, chu mi aiah chuan tuna an luah belh mek hmunah hian In sakbelh leh turin US hnenah phalna an dil a, chu an dilna chu tunah hian Cliton-in a bawhzui mek a ni. Obama hian In sakbelh tihtawpa Palestine nena inremna kawng zawng tura Israel a phut avangin leh Iran nena an inzawmna hrui chat tawh chu suih that leh a tum avangin Israel pawh a thla a phang nasa hle a ni. George W. Bush-a president term kum 8 chhunga US leh Muslim kahwvelte inkara hliamma awmte chu tihdamleh tumin June Ni 4 hian Cairo khawpuiah thu a sawi dawn a, chu a thusawi chu Israel hian thlaphang em em in a lo thlir ran dawn a ni. Israel leh Aigupta chu darker chanve chauh thlawk ni mah se May Ni 18 khan Israel Prime minister Netanyahu-a chu a tlawh tawh avangin Obama hian tun tumah Israel tlawh a tum tawh hran lova, Aigupta a tlawh hmain Saudi Arabia a tlawh hmasa thung dawn a ni. Kum 2006 June thla khan Islamic Hamas Group leh Abbas-a sipaite chu thisen luangin nasa takin an inbei a, a tawpah chuan Hamas Group ten Gaza Kawpui an pawnglak a, Abbas sawrkar chuan West Bank a control ta zawk a, he sawrkar pahnih pawh hian vawin ni thlengin inremna an la nei thei lo chu a ni. US leh EU ramte chuan Hamas Group chu Terrrorist Movement-a an hmuh tlat avangin Palsetine ram tana kumtin an pek thin tanpuina sum pawh an titawp a, inremna thu an sawi pawhin Abbas-a sawrkar nen chuah an indawr zawk a ni. June Ni 4-a Obama thusawi tur hian thu a hril thui hle dawn a, khawvel histawri tidanglam thei khawpa pawimawh tur a ni.Tuna US in in sakbelh tawh lo tura Israel a ngenna hi Israel in hnial tlat ni ta se, US leh Israel te inkarah engang buaina nge lo chhuak dawn tih hi khawvel mipuite thlir ber chu a ni. Nangteh engtin nge i lo thlir ve? By Josephsaia
No comments:
Post a Comment