University lo Chhuah Dan

(The Rise of University)
By: Alex Dinga

Tahan D

Tunlai khawvel zirna sang ber University lo chhuah dan tlem han sawi ila. University kan lo neih dan pawh ti ila a sual lovang. Middle Ages hunlai atanga lo intan tawh a ni a. I han thlir thuak thuak ang u.

Hun Laihawl (Middle Ages)

History of World Christianity hian Kristian sakhua chauh nilo, sakhaw hrang hrang bakah khawvel education, politics, economic, social, cultures, theology leh thildang tam tak pawh a huam tel nghal vek a. Hun laihawl (Middle Ages, AD 500-1500) inkara khawvel history lo siamtu chu a hunlaia khavel inawpna leh kalhmang kha a ni a. AD 0-400 inkar kha Roman sorkar hnuaiah khawvel awm hunlai a ni a. Tichuan Rome Emperor Constantine (c. 272-337) chu kristianah inletin khawvelah sorkar pakhat chauh a awm a. chu chu Roman Empire tia koh a ni a.

( Mizo chuan Emperor hi Kumpinu tiin an koh thin) Chuta lal ber chu a ni. A dam laiin Kristian sakhua chu State Religion ah a puang a. Amaherawh chu Romam Empire chu chak eng ang mahse lan hun a awm a, tawp hun a awm tih ang deuhin, a chakna reng thei bik ta lova, a hnu ah phei chuan Rome Empire chu a tluchhe ta duai duai a. Roman empire hi AD 0-400 inkar a ni. Tichuan AD 500 chho atang chuan HUN LAIHAWL (Middle Ages) hi a lo intan ta a. Abik takin Hunlai hawl hmasa lam hi Dark Ages tiin an koh a. Khawvel chu Hun Thimpui (Dark Ages) ah a lut ta a ni. Heng hun laia sakhua leh zirna, thiamna leh culture nunmawi humhalhna, sakhua tana inserh thianghlimna leh thiam zirna awmchhun chu Monastery a ni a. He kristian monastery dinchhuaktu chu hmanlai Faraw bawihte tuallenna Aigupta ram mi, St. Anthony a ni. Amah ngei pawh hi inserh thianghlim (ascetic life) tak niin, “I neih zawng zawng chu hralh la, pachhia te hnehah pe rawh” tih Bible Chang chu thawklehkhatah zawm nghalin a nun pum chu a lo inserh hrang ta a ni.

Tichuan khawvel chu Hun thimpui (Dark Ages) in a nuai vel a. Chuvangin monastery chu engkim deuh thaw inzirna leh humhalhna hmun awmchhun chu a ni. (Buddhist te pawn Monastery an nei a, Zofate context atanga kan thlir chuan Zawlbuk ang kha a ni ti ila a inhmeh viau ve ang). A hun laia mite leh khawvel khan Monastic life an ngai pawimawh hle a. Ram tinah monastic movement chu a lo darhzau zel a. Sakhaw lam chauh nilo, Science thiamna thlengin a inzirtir a. Kristian movement chuan zirna a ngai pawimawh chho tial tial a. Isua chhungkhat te Juda ho phei chuan “Khawvel hi naupang thaw-ah a innghah a ni” tiin naupang hi nasa takin an lo zirtir a ni.

University ngei mai chu

Tichuan, zirna sang university lo chhuahna idea tak chu Middle Ages a kohhran inzirtirna atang a lo intan a. AD 800-a French Lal ber, lal fel leh Kristian sakhaw mi em em, King Charlemagne hunlai atang tawh khan Khawvel thiamna lama harhna (Intellectual Awakening) a lo intan daih tawh a. Hei hianin Europe khawmual pum nunah bu khuarin a lailum a luah nghet em em a. A tirah chuan cathedral school angin bul tanin a zirtu pawh clerics tiin an koh va. Tichuan hun lo kal zelah chuan zirna runsang chu huaihawtin (din ni lovin) hall-ah te, chhuatah te, roomah te inzirtirin bul an lo tan ta a ni. A tir phatah chuan thil chi 4 a bikin an thlur a, Chungte chu Law, Theology, Medicine leh Arts lam hawl zirna a ni a. Chuvang alom Middle Ages atang tawhin ‘Theology is the queen of science’ tiin an lo koh phah ta a ni. Hei hi French ramah khuan a ni a. Tichuan, University hmasa ber, University of Paris (c. 1150) a lo piang chhuak ai. A hnu deuhah University of Bologna (AD 1088) in a rawn dawt leh a, University of Oxford (1096) chutiang zel chuan University of Cambridge a lo piang leh a. Tunlai University kan neih hi ram tinah a darh zau ta zel ta ni. A tul ang zelin subject hrang hrang kan lo zir ta a ni. A tirah chuan Bachelor of Arts (B.A) ni turin kum khat leh a chanve atanga kum hnih thleng an zir thin. Canon leh Civil law pawh an uar hle.
Europe khawmual pui khu a tir phat atangin Kristian sakhua lenna a ni a. Asia ram angin Buddhism, Hinduism, Islam emaw Shamanism, sakhua dang dang awm ve lohna a ni a, French King Charlemagne hun lai khan tum khat chu Muslim te chu indo vangin muslim arm forces an lo tudai a. Chumi tih loh tlai khawhnu-ah tuna kan sawi sakhua te hi an zuk thleng ve chauh zawk a ni a. Europe Kristianna chu Roman Empire tluk chhiat hnu, AD 500 chho atanga intanin vawiin ni thleng a ni a. Kristian Monastic movement leh Missionary te thahnemngaihna in Kristianna chu Europe ramah khuan a lo len phah ta (predominantly religion) ta a ni. Khawvel huap Kristian sakhua lo darhzau dan, kohhran chanchin erawh remchangah kan thlir leh dawn nia.

Tlangkawmna

Zofaten monastery kan nei ve tlat mai. Chu chu pipu hunlai atanga an lo koh thin, Zawlbuk ngei kha a ni a. Khawtlang nunmawi, zirna leh inhumhalhna, engkim naupan lai atanga an lo zirchhuahna Zawlbuk University lo pianchhuahna a ni a. He idea hi develop in tunlai kan zofate hun tawng mekah eng angin nge kan culture leh tawng, arts, science, leh tradition te hi kan humhalh ang tiin beng sik meuh i ngaihtuah ang u le. Kan sakhaw hawiher hian kan nun pum a control vek thin avangin Zawlbuk Theology lo pian hun tur pawh i lo thlir fan fan bawk ang u.

More