US President-te zinga mi fing leh mi ropui, mite fak leh chawimawi hlawh nasa ber chu President Thomas Jefferson-a hi a ni. US President-te zinga President pathumna a ni a, kum 1801-1809 thleng khan US President nihna a chelh bawk a ni.
America-in zalenna a puan tum khan zalenna dan fel taka siam a ni a, chu dan chu Declaration of Independence tia koh a ni. He dan hi kum 1776-a siam a ni a, Declaration of Independence dan siamtute zingah Thomas Jefferson-a hi mi pawimawh tak a ni.
Politic lama mi thiam filawr a nih avangin mi tam tak chuan ‘political philosopher’ tiin an ko nghe nghe a. Khawvel thil leh sakhuana lama mi fing leh hming thang tak a nih avangin Britain leh France mi ropui leh mi fing thian tam tak a nei bawk a ni. Declaration of Independence dan siamtute leh America hmasawnna leh ram dinhmun siamthatute chu Founding Fathers tia koh an ni a, heng Founding Fathers-te zingah pawh hian Thomas Jefferson-a chu ‘pa ber’ tia koh a ni a, Republicanism in the United States tih thupuia hmangin America khua leh tuite hmasawnna tur leh zalenna atan nasa takin hna a thawk a ni.
US President nihna a chelh chhunga a thiltih ropui berte chu Loisiana Purchase (1803) leh Lewis and Clark Expedition (1804-1806) –te an ni. (Loisiana tih hi France tawng chuan Louisiane tih a ni a, France ram ri 828,800 sq miles/ 2,147,000 km2-a zau a ni. Kum 1803 khan US- in $ maktaduai 60/ Fr.$ 11, 250,000 in a lei a, tuna America States 14 te leh Canadian Province 2-te an tel a ni. Kum zabi 17 vel atang khan ram tinin mahni ram ri tihzauh duhna thinlung an nei lian em em a, President Thomas Jefferson-a pawh hian Pacific Tuipui rala US ram ri zauh beiseiin Lewis-a leh Clark-a te a tirchhuak a, hemite pahnih kaltlanga America ram zauh a nihna chu Lewis and Clark Expendition tia koh a ni bawk.)
President Jefferson-a hian khawpuia thiltih dante leh khawpui inkaihruai dante a duh lova, a bik takin sum leh pai puktirtute chungah rinhlelhna lian tak a neih avangin Republican govergment dan khauh tak siama sawrkar din chu a tum lian ber a ni. Kohhran leh Politic thiltih inchawhpawlh/ inhnamhnawih duh lo mi a ni a, kum 1779 leh kum 1786 khan Virginia Statute for Religious Freedom tih lehkha ropui tak a ziak a ni. President Jefferson-a hian a ngaihtuahna zau tak atangin sawrkar inkaihhruai dan leh ram inawp dante a dinchhuak a, chu a sawrkar dinchhuah chu mi tam takin Jefersonian Democracy tiin an ko a ni. President Jefferson-a hi Democrartic- Republican Party dintute zinga mi pawimawh tak mai a ni a, Republican party hian kum 25 zet America politics a fanchhuak a, mi tam zawkte innghahna party pawh a ni bawk.
America indo lai khan Virginia Governor nihna a chelh a, kum 1779 June 1- 1781 June 3 thleng khan he nihna hi a chelh a ni. Kum 1789-1793 thleng khan US Secretary of States hna a chelh a, kum 1797-1801 thleng khan US President nihna a chelh bawk a ni. President Jefferson-a hian a finna leh thiamna hmanga thil ropui tak tak a tih avangin chawimawina leh lawmman pawh tam tak a dawng a, a dinchhuah ropui tak chu University of Virginia hi a ni. President John F. Kenndy-an White House a luah tum pawh khan, “He White House-ah hian mi fing leh mi ropuite hriatna leh thiamna leh ngaihtuahna zawng zawng a fuankhawm vek a, hmun zahawm leh hmun ropui ber a ni. He In ropuiah hian Declaration of independence puangtute zinga President Thomas Jeferson-a pawh khan mal takin chawihlui a lo kil thin tawh bawk a ni,” tiin a hmaa President-te hriatreng nan a sawi a ni.
President Thomas Jefferson-a hian President nihna term hnih zet a lo chelh chhuak a, he term hnih chhung hian Congress-in bill a siam chungchangah a President nihna (veto power) vawikhat mah a hmang lo a ni. A finna leh thimna a zau em avangin leh President zahawm tak a nih avangin mithiam (scholar)-te chuan US President-te zinga mi ropui ber a ni tiin an sawi a ni.
No comments:
Post a Comment