Kawlramah lungin tang mi 7,000 an chhuah leh

September 17, khan Burma Television atangin Burma sipai sawrkar hruaituten lungin tang mi 7,000 chuang an chhuah thu puan a ni a. Hetianga Burma sipai sawrkar hruaituten lungin tang mi tam tak an chhuah ta hi kum 2010 general election a hnai tawh avangin leh international community-ten Burma sipai hruaitute chunga pressure nasa tak an pek avanga chhuah ta niin mi tam tak chuan an sawi a ni.


Tun tuma an chhuah mi 7,000 zingah hian politic avanga lungin tang mi engzat chiah nge hriat a ni lova, tunah hian politic avanga lungin tang mi 2,000 chuang zet an la awm a ni. Henga la awmte hi ’88 Student Revolution-te zinga hruaitute an nih loh avangin United Nations leh international organization leh NGO-te chuan a rang thei ang bera chhuah vek turin Burma sipai hruaitute an ngen bawk a ni.

Nikum kum tawp lam pawh khan mi 9,000 chuang lai an chhuah tawh a, mahse politic avanga lungin tangte erawh U Tin Win-a leh midang 100 vel chuah an tel a ni. Kumin kum tantirh lam pawh khan lungin tang mi 5,000 chuang zet an chhuah leh a, amaherawhchu politic avanga lungin tang mi lar deuhte erawh pakhat mah an tel lo a ni.

Tunah hian kan pi ber Suu Kyi-i leh U Khan Thun Oo-a te, Ko Min Ko Naing-a te, Ma Su Su Nui-i te leh politic avanga lungin tang mi 2,000 chuangte chu lunginah an la awm mek a ni.

More