Zirna dik tak chuan kan nitin nun khawsak dan tur te, mite nena tluang taka kan indawrtawn theih dan tur te, rilru leh taksa lama hrisel taka kan awm theih dan tur te, a chhia leh a tha kan hriathran theih dan tur te, awmzia nei taka nun kan hmanthiam dan tur te, nu leh pa, u leh nau, chhung leh khat, khawtlang leh kohhran, ram leh hnam tana kan mawmhphurhna hlen dan tur te a huam tel vek a ni. Zirna hriat tum lova, mite ngaihsan leh sum leh pai hauhsakna tur chuah ngaihtuah a, kan nun leh hun tha kan hman chhung chuan kan nun pawn nun hlimna thuruk a hmuchhuak thei tak tak dawn lo a ni.Chuvang chuan zirna dik tak hria a, awmzia nei leh mumal nei taka kan nun kan hmantheim theih nan community-a kan mawhphurhna hi a bik takin kan zirho dawn a ni.
Khawtlang(Community) tih hian kan pian leh murna mai a kawk lova, kan ram leh hnam, kan mihringpuite a huam tel vek a ni tih hre hmasa ila. Hetah hian theology pakhat han zeh tel zauh ka duh a. Johana 3:16 ah, Pathianin khawvel a hmangaih em em a, chutichuan a Fapa mal neih chhun a pe a." tih kan hmu. He thu hi a mal te te a hrilhfiah vek sen a ni lovang. Thelogy thuk tak inthup nia lang te chu," Khawvel" tih te, " A hmangaih" em em tih te,"Neih chhun" tih te, "A pe" tih te an ni. Pathian chu a lal thutthlenga chatuana rorel thei a ni a, mahse Pathianin chu chu a thlang tlat lo. A chhan engnge ni? A mite an boral a phal lo. Chatuana an nun a duh tlat. Zirna hlawhtling kan tih pawh he theology ang chiah hi a ni. Zirna dik tak hria chuan a finna leh thiamnate a ma hlawkna leh ropuina, a hamthatna a tan chauh hman a tum ngai lo. Chutini lova mahni tanghma chauh siala a finna leh hlawahtlinna hman a tum chhung chuan zirna dik a la hmuchhuak lo tihna a ni. Chumai nilovin nun awmzia nei, nun dik tak (philosophy of life) pawh a la zirchhuak lo tihna a ni.
Mother Theresa-i chu kan hrechiang hlein ka ring. A rawngbawl dan te leh mite tana a nun a pek dan te pawh kan hre vekin ka ring. Vawikhat chu tihian an zawt a,"Engvangin nge hetiang em em a Pathian tana hna i thaw ni," tiin. Entin nge a chhan tih chuan,"Kei chu Lalpa kuta pencil te tak te mai chauh ka ni e. E, keia hnathawh chu tuifinriat tui zinga tui farkhat ang lek chuah hi alawm. Amaherawhchu thawk lo ila chuan tuifinriata tui hi farkhatin a kiam dawn tlat si a, chuvang chuan thawk lo thei ka ni lo," tiin a chhang.Chu chu a ni zirna dik tak hria ka tih chu ni! Khawtlangah mawhphurhna a te a lianin kan nei theuva, mahse kan mawhphurhna te chu tumahin a vai chuan kan hlen vek thei kher lovang. A te bera kan ngaih pawn hlutna leh tangkaina a nei vek a, kan theih chinah kan zam mai tur a ni lo. Pathian pawhin kan theih bak lo chu engmah min phut ngai lovang. Thil tha leh dik kan zir leh hriatchian reng reng chu kan dinpui ngam tur a ni.
Philosopher zinga Pa bera kan ngaih Socrates-a pawn a thil hriatchian hnawl ai chuan a nunna chan a thlang zawk a nih kha! Mother-i bawk kha han sawi leh ila. A thusawi ropui ka tih em em pakhat chu," In fate chu in enkawl peih lo a nih pawhin ka hnenah han la rawh u, keimahin ka lo enkawl zel ange," tih hi a ni. Mother-i hian heng thil hi thil tenau ah a ngai mai lova, Pathianin a pek a mihringpuite hnena a mawhphurhna a ni tih a hrechiang hle zawk a ni.Vawikaht pawh Billy Graham -a nupui Ruth-in heti hian a sawi a," Keia mawhphurhna chu Billy-a hmangaih hi a ni a, Pathian mawhphurna chu Billy-a siamthat hi a ni," a ti. Chuvangchuan zirna kan tih pawh hian mawhphurna rit tak tak leh kan tlin loh thil a kawk vek kher lo. Kan theih tawk leh tlin tawk theuhvah kan mawhphurhna hlen zel hi zirna dik takina a tum zawk a ni.
Time Magazine-in The Great People of the 20th Century-a mi ropui a thlanchhuahte zinga scientist mi thiam Albert Einstein-an thu ropui tak pakhat a sawi ka hre reng thin." A hundred times a day, I remind myself that my inner and outer life are based on the labors of other men, living and dead, and that I must exert myself in order to give in the same measure as I have received and am still receiving." tih hi a ni. A sawi tum ber chu," Ka nun chhungril(ka finna leh thiamna leh zalenna) leh pawn lam(ei leh bar, sum leh pai, ka nitin nun khawsakna) te hi tuna nung mek te leh boral ta te hnathawh rahah a innghat vek a, an hnen atanga ka dawn ang bawkin ka dawn zawng zawngte an hnena pekir leh turin ka chungah mawhphurhna a innghat a ni. Chuvang chuan thahnemngai tak leh taima taka hna ka thawh a tul a ni." a ti.
Hetianga hriatna thuk tak hi a ni zirna hlawhtling, zirna dik tak hria mifing ka tih chu ni! Theology lam dahtha lawk ila. Kan neih leh hriat leh hmuh te pawh hi mi dangte hnen atang vek a ni a, an hnenah engangin nge kan peklet dawn tih hi zirna kan tehna atana thil pawimawh ber( principle) a ni. Britist sipai huaisen, a hnua PM lo ni ta, Winston Churchill-a pawn," We make a living by what we get, we make a life by what we give" a ti a, a awmzia chu, Kan dawn thilte atangin ei leh bar,silh leh fen kan nei a, nun erawh kan pek thilte atang chauhvin kan nei thei a ni," a ti. Kawvel Indopui II-na ah pawh khan Soviet Unions chuan Pacific Asia ram zawng zawng a run a, East Germany pawh a lak hnuin Bristain a han bei a, chumi tum chuan Churchill-an Bristist mipuite hnenah, " Men, I can offer you nothing,but blood, sweats and tears." a ti. " Aw unaute u, eng dang mah pek theih che u ka nei lo. Ka pek theih chhun che u chu, thisen, thlantui leh mittui chauh hi a ni," a ti.
Kan Kalay-Kabaw chhehvelah pawh zirna run sang tak tak a tam ta hle mai a, a lawmawm tak meuh meuh a ni. Chitih rual rualin kan khawtlang leh kohhran, ram leh hnam tana pasaltha mi puitling kan la chherchhuak tlem lutuk hian rilru a khawih hle a ni. Tunah chuan zofate zingah pawh matric pass leh post graduate tih tur kan nei ve ta nual mai a, keini veng te tak te Tuivar khua pawh kan bang bik tawh lo. Mahse kan khawlai nun dan ka thlirin puitlinna lam pan tum aiin zenawi tak tak, tih tur leh tih loh tur, sawi tur leh sawi loh turte pawh hre hrang thiam lo valrual leh lanurual kan la awm tam hle hi a pawi deuh zawng a ni. A chhan chu kan education tobul a tha tawk lo tih a chiang a ni. Zirna run( Boarder) tam zawkte chuan education kawng dika naupangte kaihruai lovin mahni hlawkna tur lam chauh thlirin kan Kawlram education System hnungzuiin kan kaihruai a, mipuitling tak aiin degree la te chu an tam ngei mai, mahse kan socity leh community-ah rah seng tur reng kan la nei tam thei lo chu a nih ber mai hi! a chhan engnge ni ta ang le?
Zirtirtu tam zawk ten society leh community-a kan mawhphurhna te, kan awm dan turte leh khawsak dan tur te zirtir tel lovin English changkang kan tih Idiom leh Phrase Expression hrang hrang kan fawmkhawmte leh an subject leh distinction an hmuh tam theihna tur lam chauh thlirin kan zirtir a, chuchuan an nungchang ( character) a siamtha hran lova, an hlutna (value) pawh a hriatbelhtir chuan lo a ni. Miin mahni hlutna (value) mah a hriat si loh chuan mihring hlutna (human value) chu engtin nge a hriat teh lul ang ni. I va sawi huai ve i ti mai thei. A pawi lo. I tehna leh ka tehna (principle) a inanloh vang mai a ni ang. Kan matric pass te leh post graduate valrualte leh lanu rualte khi han chik chiang ve mah teh. Pass mark tha hnu leh distinction 3/4 hmu te pawh i hre mah na. Mahse kan sawi tak mihring hlutna (human value) hria a, nun fel tak hmanga mahni chhungkua, kohhran leh khawtlanga mahni mawhphurhna fel taka hlen tum mi engzat nge i hmuh? Mihring hlutna ka tih chu engnge ni a, enganga teh tur nge ni ang le?
He thu hi tehna tha tak niin ka hria a," A man's value to the community depends primary on how far his feelings, thoughts and actions are directed toward promoting the good of his fellows." Miin a ram leh hnam, khawtlang leh kohhran leh a mihringpuite engangin nge a vei a, engangin nge a ngaihtuah, an tan engangin nge hna a thawh tih hi a hlutna innghahna bul chu a ni," tih hi. Zirna leh khawtlang chuan engangin nge inzawmna an neih i ti mai thei. Sap thufing chuan,"No man is an island," a ti a, " Tumah thian leh rual nei lo an awm lo," tihna a ni. Mihring chu community-ah a cheng, a nung, a khawsa a, a mah chauhva nung hrang thei leh kawsa thei a ni lo.Mi hnen atanga hriatna leh finna kan dawn ang bawkin kan hmasawnna pawh mite chungah a innghat vek a ni. Mite hmasawnna tur ngaihtuah tel hauh lova mahni hmasawnna tur chauh kan ngaihtuah chuan nun kan zirna (philosophy of life) a la dik lo tihna a ni.
Mahni fate hmasawnna tur chauh ngaihtuah a, mi fate hmasawnna tur kan ngaihtuah tel loh chuan kan fate pawn buaina an tawk an tawk ang.A chhan chu an thian kawmten zirna an tlakchham a, hriatna an neih tlat si loh chuan chung mite chu an tan ral ang hlauh an ni dawn tih a chiang a ni.Chuvang chuan zirna kan tih hi mahni chauhvah tanlak chiam theih chi a ni lo. Chhungkua khat chauhvah tanlak theih chi pawh a ni bawk hek lo. Tan rual dial dial a, in puihbawm tawn a, a tiha tihkhawm laih laih chi a ni. Chutilo chuan kan ram leh hnam nun a mawi tak tak thei lovang. Khawtlang leh kohhran pawh a tha tak tak thei ngai lovang. Mi tam tak chuan khawtlang leh kohhran siamthat tih hi kan sawi chamchi a, mahse enganga siamthat tur nge a ni tih erawh kan ngaihtuah zui tawh lo.
Pu F Lalrammawian,"Kan Mizia" tih article-ah, "Khawtlang leh kohhran siamthat duh kan inti a, a siamthatna tak tak tura in pe thei der si lo, mi tih atana sawi zut zut thiam kan ni," a tih hi dik hlein ka hria. Khawtlang leh kohhran siamthatna hmanrua chu engnge ni ta ang le? Kan hriatloh te inhriatir a, inzirtir mawlh mawlh hi a ni. Hetianga zirna dik tak awmzia kan hriatchian a, community-a kan mawhphurhna (Our responsibility toward community) te fiah taka kan hriat chuan kan nun khawsak dan (philosophy of life) a lo mawi ang a, khawtlang leh kohhran pawn hma a sawnin a lo thangchho deuh deuh dawn a ni.
E......Ka subject chu khelh a nuam dawn chauh emaw ka ti a, khawikhawm a lo hun ta der mai.He subject khaikhawmna atana tha ber tur ka ngaihtuah a, dictionary leh encyclopedia lamte ka han rawn a khaikhawm thei tur thumal leh phrase ka hmu zo lo. Beidawng der chuan ka thu hnawp a, fim takin ka han ngaihtuah leh a, chutah kan Mizo philosophy ropui ber nia ka hriat ka rilruah a lo lang hlawl mai. Chu chu hei hi a ni," A hun takah thil ti la, a hmun takah thil dah rawh tih hi." He "Tih Tur" pahnih hi nitin, zantin, darkartin, second tina kan vawn reng a, a taka kan hman zel a, kan nun chilh phawt chuan philosophy of life kan zirchhuak tinna a ni ang a, kan subject in a tum ber a(fact) pawh TK. Paula angin, "Tunah chuan ka man ta," kan ti thei tawh ang.
No comments:
Post a Comment