Ka Ngaihhlut ber Nu Hna

Ka Ngaihhlut Ber NU Hna
By: Nl. Lalkhumthangi
Letpanchaung
Published on: May 9th, 2009 | Posted by: http://zoin.info

Khawvela ka ngaihhlut leh ngaihsan ber chu NU hi a ni. Khawvel finna lama hming thang berte aiin nu mawlmang tak, fate tana nun inpe zo tak hi a ngaihsanawm zawkin ka hria. Chuvangin, NU la nih hma hian “am” takin nu mawhphurhna rilruin a vei em em thinte chu kan thailang ve mai mai teh ang. Chhiar tlak ni ve tak ang maw? Tunlai zofa hmeichhiate hian pasal neih loh kan hlau nge? Kum naupang te te hian pasal kan nei mawlh mawlh mai thin hi, i ngaihtuah ve ngai em? A then phei chu pasal a nei tih pawh hriat hma hma hian; an lo then fel lehdiam tawh a. Hmeichhe tan inneihna hi a ni ngawt mai lova, HNA a ni.


Pasal kan neih dawn chuan hna ropui tak thawk tur kan ni a. “Kan pasal tan leh kan fate tan nu nih kan tling a ngem?” ti a, rilru inbuatsaih fel diam hnua neih chauh hi a tunlai deuh. Rilru inpeih fel mang si lova, Nu hna thawk ve ngawttu chuan nakin lawkah fate fahrah leh chhungkaw hremhmun a din mai ang tih hi a hlauhawm a. Fate fahrah leh chhungkaw hremhmun din ai chuan; chhungkaw din lova len tar hmiah hi a ngaihsanawm zawkin ka hria. Khawvela thil mawi leh hlu ber chu hmeichhiate hi kan ni a. Khawvel ti chhetu pawh hmeichhia bawk kan ni. Hmeichhiate hian kan nihna leh Pathian min siam chhan hi chhut ngun ila. Khawvel ti eng tur hian Pathian hian min duh a ni. Chuvangin, kan awm dan leh kan nungchang hi mite chhiartlak nithei tura kan inbuatsaih a ngai a. Nungchang hi ro a ni. Hausakna ripui ber a ni. A bik takin hmeichhia incheina mawi ber a ni. Hmel thatna chu rei lo te hlimna thlentirtu a ni a, nungchang tha chu dam chhunga lungawina thlentu a nih bakah a chenpuite tan thlamuanna a thlen thin. Bible-ah, “Duhsakna hi bumna a ni a. Hmelthatna pawh engmah lo a ni. Lalpa tihtu hmeichhia erawh fak a ni ang(Thufing31: 30),” tih ziak kan hmu. Pathian pawhin hmeichhe khawsak tha chu a ngaisak thin ang hian; mipate pawh hian hmeichhe nungchang thate chu an ngaihsak thin.

Kan nu leh pate huangah hian thlamuang takin kan khawsa thin a. Kan nu leh pate pawh hian min thlahlel hle thin. Amaherawhchu, pasal kan neih hian kan pasalte chhungin min ngaipawimawh lo mai thei a. Hei vang tak hian nu leh pa huanga kan awm lai hian; nu ni tura lo inbuatsaih ruk ran mai tur. Rilru lam zirmite chuan, “Mipa mamawh bulpui ber chu hmeichhe duhawm, pasalte “Amen”-pui thiam leh pasalte Ngaisang thiam mite hi an ni e”, an ti. Hmeichhiate chuan hmangaihna kan mamawh hmasa a, mipate chuan kan ngaihsanna hi an mawmawh hmasa thung. He kan danglamna tak hi kan hriatthiam a tha hle ang. Chuti nilova an thu kan hnial fo emaw, kan thua awmtir kan tum emaw anih fo chuan a rukin an rilru kan hliamsak fo thin a ni. Kan hriat loh hlan hian kan lak ata hla takah an lo per bo daih thei a ni.

 Pasal kan neih hian kan pasalte chu an tlangval lai pawha mi tawrh mawh tak a ni tih hrereng chuanga kan nei lui anih chuan; an thuhnuaia kan intuk luh hi hmeichhe hna a ni. Kan chhungril tak chuan hrehawmin harsa ti hle mah ila kan sa himna a ni. Anmahniah hian fakna tur awm thlawt lo mahse dawhthei takin kan tan an pawimawh zia leh an hlutzia thu hi kan hrilh fo chuan, lo tihtauh a, sawisel fo ai chuan kan siam tha zawkin a rinawm. Hmeichhiate chu inchhung boruak siamtute kan ni a. Chhungkaw ti nuamtu leh ti hlimtu pawh kan ni thei. Lungngaihnaa hnuk thlatu pawh anih theih bawk. Hla phuah thiam Pu Rokunga chuan Chhungtin khai dingtu ber chu Chunnemi a ti mathlawm lovin, chhungkaw tan chuan nu berte hi an pawimawh tak meuh meuh a ni. Fate enkawltu ber an nih bakah chhungkua leh nupa inkara inlaichinna pawh siam tha thei bertu kan ni. Chuvangin, pasal kan neih chuan kan pasalte tan leh kan fate tan innghahna tlak kan nih a tul a, dawhthiehna leh ngilneihna hian kan thinlunhah hmun a chang reng tur a ni. Chhungkuaa nu ber a hlim viau chuan a pasal leh a fate pawh an hlim thin. An nitin awm dan tur atan nu ber chu an entawn a ni si a. Nu phunchiar leh an-hrat tak inchhung chu hremhmun note a ni. Mrs. Donna-i chuan thlanlunga thu inziak chu a chhiar a, chu chu, Ani chu kan chhungkua tan eng a ni tih ziak hi a ni. Mrs. Danna-i chuan a rilruin Kei hi lo thi ta i la. Khatiang thu kha chu ka thlanlungah chuan an ziak lo hmel hle a ti a. Chumi ni, chumi darkar ngei chuan an chhungkaw tan ENG nih chu a tum ta ran mai a ni. Keini pawh Mrs. Donna-i ang hian kan chhungkuaah ENG nih i tum theuh ang u hmiang.