View Point: Burma leh North Korea-te indawrtawnna

Burma leh North Korea-ten tun hnaia ralthuam lama indawrtawnna leh Nuclear research lama inzawmtawnna an siam avangin hetiang lama Burma leh North Korea-te inzawmtawnna hi ASEAN ramte tana thil hlawhawm a nihtheih thu chu tum tum Thailand rama South East Asian Prime Minister-ho rorelnaah khan US State Secretary Hillary Rodman Cliton-i chuan a sawi a ni.

July 21 khan Thai Prime Minister Abhisit Vejjajava-a leh Clinton-i te chu Bankok-ah an inhmu a, Cliton-i chuan, “Burma ramin hmasawnna kawng zawh a tum loh avangin Burma ram hruaitute dinhmun tihdanglam tumin tunah hian Burma ram thenawmte nen hna kan thawk tlang mek a ni. Tun hnaia North Korea nena an thiltihte hian ASEAN ramte a nghawr ang bawkin US pawh Burma chungah a thinrim hle a ni,” tiin a sawi a ni. US leh Thailand ramten inzawmna tha an neih avangin Thailand chungah pawh Burma a lawm lo hle a, hmelma ang taka a thenawm hnena thu a sawi chang pawh a tam tawh hle a ni. Burma chuan Thailand atanga US sipaite an rawn luh mai a hlauh avangin inbuatsaihna nasa tak a siam a, an inralring reng bawk a ni.

May 25, Thawhtan Ni khan North Korea chuan a nuclear a chhin leh a, chumi avang chuan UN Security Council-in North Korea chungah sanction thar a siam leh a, North Korea a lungawi loh avangin UN Security Council cho nan a lawngpui chu Burma ramah a kaltir a, he thil avang hian US pawhin Burma leh North Korea-te indawrtawnna chu chik takin a enthla reng a ni.

International community-ten Burma chunga rinhlehna an neih mek laiin Burma sipaiten lei hnuaia an siam thlan ropui tak tak thlalakte pawh khawvel hmuha phochhuah a ni a, sipai hruaitute zinga nihna sang ber 3-na General Sui Man-an North Korea tlawh a tum thute pawh mitin hriat a nih avangin khawvel ram hruaitute pawh Burma chungah an thinrim nasa hle a ni.

Burma leh North Korea indawrtawnna phenah hian Russia leh China te an awm tlat niin thirtu tam tak chuan an sawi a, Burma ram hruaituten Russia ramah kum 2000 atang khan sipai zirlai mi 1000 chuang a thawnchhuak tan tawh a ni. Hetainga Russia-in Burma leh North Korea indawrtawnnaa tanpuina a lo pek zel hi US in engangin nge a rawn tih dawn tih a hriat duh vang niin mi tam tak chuan an thlir bawk a ni.